@العشك يهديب عمري كلفاني
وحبنه بغير حبكم كلفانــي
سهمك من رميته كلفانــي
شك صدري وجزاني رردعليه
@قدر مكتوب حبك وانته قسمه
الواحد ماله ناتج من تقسمـــه
لون بسيوف كلبي من تقسمــه
شوف معزتك شنو مسويه بيــه
@دخيلك عداله وياي وانصاف
عيونك كطعني رباع وانصـاف
شوكت نتلم انه وياك ونصـاف
ويجينه العيد ونعيد سويــــه
@بدمع عيني اكتبلك خاطر انه
والك ما يوم كاسر خاطر انـه
غير انته تجيني خاطر انـــه
اجيك معتني زحوف على اديه
@وحك من مرضك يا اسمر وشافاك
اتخبل كلمن لمح حسنك وشافــاك
لون اشتم عطر خدك وشافـــاك
مناعه من الامراض تصير بيـــه
@رشيق الطول كال بشعر صفنه
وجمالك بالشعر يراد صفنـــه
بطولك لو تجي وتصير صفنــه
صفر ينطونه وينطوك ميـــه
@جنه من الدفو يا ناس حضنه
عععشكته وما كعد وياه حظنه
ماردت الطمع بس ردت حضنه
ومن احضنه محد يفكه من اديه
@غرامك صار الي معبد وقبله
وارضه بكل نقد منك واقبلـه
وابوس الصخر واشتمه واقبلـه
لأن قاسي مثل كلبك عليــه
@ردت طيفك يلوح بيوم ما لاح
وطعم فركاك صار هواي مالــح
بعد مادز رسالة وابد ما الـــح
لأن كلما ادز ما ترد عليــــه
@دمع عيني على الخدين جاري
وجرالي الما اظن بالناس جـاري
ريت اللي احبه يكون جـاري
واشوفه بكل صباح وكل مسيه
@نشدت الناس عنك وانته هينه
وعلى فراكك تلفنه وانتهينــه
الكلب انته التعذبه وانته هينـه
ويظل اسمك حلو وغالي عليـه
@عرفتك وعرفت لغزك وحلاك
سبحان من جملك يا اسمر وحلاك
صعبه اهدنك من اديه واحـلاك
لان بفراكك يعني المنيــــه
@حفرت اسمك بنص الكلب بيران
وعليك تصب الدموع بيـــران
احلفك بالرضا المدفون بيـــران
تحبني صدك لو تضحك عليــه؟؟
filo_mome (12/11/28 11:24:15 م): يكولون عنك مو حلو بس انت بعيوني كمر دمك مثل لون الورد ومنكع بهيل وشكر ياريحة اورود الصبح يالذة عيون السهر بشفافي لميت الخمر كله ودنيت لشفتك شو من وصل يم شفتك خمري سكر وردت أفرش عيوني اعله طولك مكدرت من يكدر بعينه يلم طول النهر ؟ واتعذرت .. ما أكتب بوصفك شعر ولا أرسم لوجهك صور هو اليشوفك هم يضل عده عقل يكتب شعر يرسم صور ؟ وصدكني يالوحة حسن كلمن يكلك مو حلو والله ما عنده نظر انت الهوى هذا الهوى يتمنى ماشه يصير الك يتعلك بطرف الشعر
أحدث الصور 
التسجيل 
الخميس نوفمبر 29, 2007 7:27 am
